أمد/ يقول خميس بعد ان انتهى الانذار وخلصت حالة الانبطاح على الارض وارتفعت الصخره الجاثمه على صدري لاكثر من ما بعرف قديش بصراحه انا الساعه واقفه عندي لا بعرف اليوم ولا التاريخ ولا الوقت ولا الدنيا ليل ولا نهار كل اللي بعرفه ان الدنيا ظلمه وزحمه ومفيش مكان تنام ولا تتمدد ولا تتعالج ولا تتخبى ولا تقعد وكان يوم القيامه انتظرت ناكر ونكير ان يأتوا ليسالوني حكولى استنا لسه دورك ما اجاش التهي واقعد فاكر فش غيرك ..شو نحلفلك من يوم ما بلش العدوان ما احنا قادرين نوخذ نفس ولا نحك راسنا ولا نشرب كاسة شاي ليش هو في غزه شاي ولا كعك.. بتعرف بدنا نربطلك هل سلكين وتصحى ترجع تبيع كعك بلكي لحقنا الدور بكعكه ..

ول وصلت لناكر ونكير مش لاقيين يوكلوا ..

تذكرت شمهورش اخو الشلن ما سأل عني ولا قال كيف حالك من ساعة ما دخلوني نفق التصوير وشرد خايف ينحرق بس أعطاني الكود وحكالي بس بدك اياني قول يا زريفه هاد كود ما بتنساه ولا بينسى لا دنيا ولا آخره...

بصراحه خايف اقول يا زريفه تنطلي مرتي بدل شمهورش مشان هيك قلت خليني ساكت مش ناقص قرف اذا ربطولي هل سلكين وصحيت بكون عارف وين انا وفي الوقت اللي زريفه ما بتسمعني بنادي على اخو لمطبله شمهورش مع انى عارف انهم ملهمش صاحب ..

أخذنا الحكي وبعد ما قام عنى المدحله مد ايده وقال سامحني يا اخوى ما شفتك ان شاء الله ما عليك شر سلامتك ..ولما ما رديت قعد يصوت هان في واحد ميت او شهيد الحقونا ما حدا رد عليه في الاخر جارتنا في الممر حكتلوا هاد لا هو ميت ولا هو طيب بيقولوا ميت سريري ..ليش هو في سرير ليموت سريري يموت ويخلصنا لاقعد مكانه بس يضل حاجز مكان عل فاضي ..اقلك زيح غاد يا خو خليني اقعد وزاحني وقعد وتقرفصت رجلاي ومع ذلك قلت يا خميس انت احسن من غيرك غيرك مش لاقي نص متر يقعد فيه ...

بدا صاحبنا ياصاحب معي وقال بما انك مش صاحي خلينا نتعرف اقلك بلاش نتعرف خلينا نتخرف انا واياك طيب كيف بدنا نتخرف وانت نص ميت اسمع انا بحكي وانت بتسمع بس دير بالك بخبط في بطنك اذا بتصحى بشل عرضك انا رج احكيلك شغلات ما حكيتها لمخلوق من زمان بدور على واحد زي هيك احكيله وهو يسمعني زي الدكاتره النفسيين والحلو في القصه ببلاش وقد ما بدي احكي كل الوقت الى فش حدا غيري ..

كيف انا معك بعدين بدل ما تظلك صافن هيك بنضيع وقت انا واياك بس انت شو اسمك . ..شو بدي اسميك شو بدي اسميك لشو اغلب حالي وادور على اسامي اليوم الخميس رح اندهلك خميس وبكره جمعه واذا ظلينا عايشين للسبت بنسكت وبنسبت مع اليهود . 

اتفقنا يا حج خميس والله باين عليك راجل طيب وجهك منور وحالق كمان ..

قبل ما نبدي فش معك سيجاره من اولها بلشنا استغلال كمان شوي بتقلي شوفلك كم شيكل مد ايده وبدأ يحسس على جيابي ويزغزغني مش قادر اضحك بيدور على باكيت دخان وكل ما راحت ايده لتحت بقول يخرب بيته هاد شو بده شكله ما بيدور على سيجاره اخو لمطبله ولك شيل ايدك والله لاكسرلك اياها بس اصحي ..

المهم نفضني ما لقي ولا شي قال والله يا خميس انظف من الصيني بعد غسيله شكله حدا منفضك قبلي ما معك اشي جاهز للقبر .

اسمعني يا خميس من زمان بدي واحد زيك انا احكي وهو يسمع وما بيسجل اخ يا خميس قلبي مليان لو تعرف بدي اتفجر ولو تعرف قديش انا بكره خميس والخميس وهلا بالخميس كنت زمان بحيك وبستناك وبجهز حالي والكاجو والفستق والجوز والموز واللوز والعسل يا عسل وبعدين سلامة فهمك بتعرف شو بيصير ليلتها واحلى فطور الجمعه والمره تتقافز في البيت وبتدندن يا ليلة العيد وقبل الصلاه دوش ودشداشه مكويه معطره للذهاب إلى المسجد كان محسوبك ما بيصلي غير في المسجد العمرى وكتير كنت بقابل ابو العبد هناك إلى أن جاءت حرب ٢٠١٦ وبس ربنا نجاني  لما اليهو̀ خبطوا صاروخ جنب بيتنا يوم الخميس ومن يومها انقلبت حياتي فاهم علي او خليني احكيلك من زمان بدي احكي ومش لاقي حدا يسمع او خايف احكي يفضحوني بتعرف غزه احنا اذا واحد ضرط في بيت حنون اللي في رفح بيسمعوه وبعدين ما احبنا احنا الغوازوه في النميمه وتلطيش الحكي ايش يا خو سمعت خميسك خربان ايش يا خو سلملي عل خميس ايس يا خو ما صلحت الشسمو ومن هل حكي واذا واحد بالشارع بينادي يا خميس بفكره قاصدني وبيحمر وجهي خجل  طبعا انت فاهم محسوبك شايف هل جثه ١٣٠ كيلو بعين الشيطان كنت زي الحديد بهد جبال من بعد هداك  اليوم يا خميس صاحبك صار شريطه زي حكايتك هيك بالزبط موت سريري لا هو حي ولا هو ميت بيسمع وما بيفهم  عامل حاله مطنش 

ومن يومها يا خميس انقلبت حياتي اتبهدلت يوم الجمعه لا فطور ولا حمام ولا دشداشه مكويه والمره الشيطان بتنطط في وجهها والله يا خميس صرت استحي اروح عل جامع مع مين بدي اصلي في جامع الزلام  ولا في جامع النسوان كيف بدي اسلم على ابو العبد شو رح يفكرني مهو مكتوب على جبيني مش نافع ..بعدين صرت اروح اصلي في جامع قريب من الدار كلهم ختياريه بيصلوا فيه ومن اول جمعه استلموني تعال يا عم انت ابن مين ليش وجهك اصفر شو قصتك  شو غرقانه المراكب في البحر ولا صاحبك نايم يا جماعه حلو عني فش غيري في البلد 

اخذني واحد منهم على جنب وحكالي انا عارف شو قصتك ودواك عندي...

 ايدي في حزامك يا عم شفت كيف وانا اجر رجلك وما تحملت غلوه معي دخيلك يا عم ما تفضحني ..

زبطني بوصفه عسل وما بغرف شو سلخت منها اول مرتبان وبلشت احاول تحسن الوضع باقي الايام وظل متنح يوم الخميس والمره راسها والف سيف في حدا عاملك عمل رابطك عني يوم الخميس وخربت العلاقه من يومها يا بتزبط الخميس يا ما بعرفك ولا بتعرفني يا بنت الحلال ربنا خلق الدنيا في ٦ ايام وترك الخميس للراحه بلاش الخميس فهمت يا روحي باقي الايام للشغل والخميس ربنا خلقه مشان تزبط حالك وانت اشتغلت بالعكس صلحت باقي الأسبوع وخربت الخميس ..

وبعدين مع اخو هل مطبله مطوله معك هل قصه يا زلمه اتركني انام الحمد لله انه اليوم الخميس كان ما بعرف شو رح يصير مع هل معتوه.  ..

اسمع يا خميس وقبل ان يكمل طاخ صاروخ في الطابق العلوي فوق روسنا وتداخلت الاتربه مع الدخان مع رائحه القصف مع اصوات وصراخ ودماء الجرحى والنازحين وكل ما اسمعه ان الدبابات الإسرائيليه وصلت عل باب الشمالي ودخلت الي الساحه ...ربنا يستر 

يتبع